कविता : सगळे गाती सूर लावुनी,

कविता :  सगळे गाती सूर लावुनी

सगळे गाती सूर लावुनी, जीव लावुनी गातो कोण? 
 कवितेच्या गर्भात शिरुनी भावार्थाला भिडतो कोण?
 गीतामधली भाववादळे सबल स्वरांनी झेली कोण ? 
 अहंकार फेकून सुरांना ममतेने कुरवाळी कोण?
 नाभीतून ओंकार फुटावा तैसे सहजच गातो कोण ?
 गात गाता, अक्षर अक्षर सावधतेने जपतो कोण? 
 शब्दांच्या पलीकडले स्पंदन सुरातुनी आळ‌वितो कोण?
 गीतामधली विरामचिह्ने, तीही बोलकी करतो कोण?
 निजस्वराचा पहिला श्रोता अपुला आपण होतो कोण ?
 विश्वामधल्या रसिककुळाशी सुरेल हितगुज करतो कोण? 
 कोण प्रश्न हा उठतो कसा. 'लता' म्हणा अन् गप्पा बसा.
 कोण म्हणजे दुसरे कोण?
 लता मंगेशकर आणखी कोण?  -

 यशवंत देव