रुग्णालयात एकाच दिवशी 9 मुलींचा जन्म; नवरात्रीच्या पार्श्वभूमीवर अनोखा योगायोग...

 रुग्णालयात एकाच दिवशी 9 मुलींचा जन्म; नवरात्रीच्या पार्श्वभूमीवर अनोखा योगायोग... 

कल्याण  (  शंकर जाधव ) नवरात्रीचा पहिला दिवस कल्याणातील वैष्णवी रूग्णालयासाठी काहीसा खास आणि दुर्मिळ असाच ठरला. या रुग्णालयात काल  एकाच दिवशी  ९  मुलींचा जन्म झाल्याची अनोखी घटना घडली आहे. नवरात्रीच्या पहिल्याच दिवशी घडलेल्या या दुर्मिळ योगायोगाची वैद्यकीय क्षेत्रासह सगळीकडेच चर्चा होत आहे. 

कल्याणातील सुप्रसिद्ध डॉ. अश्विन कक्कर यांची सामाजिक आणि  संवेदनशील व्यक्ती म्हणून सर्वत्र ओळख आहे. त्यांच्या वैष्णवी मॅटर्निटी रुग्णालयातील शनिवारचा दिवस त्यांच्यासाठी काहीसा वेगळाच ठरला. शनिवारी त्यांच्या रुग्णालयात थोड्या थोडक्या नव्हे तर तब्बल 11 महिलांची प्रसूती करण्यात आली. ज्यामध्ये ११  पैकी ९  महिलांनी मुलींना जन्म दिल्याची माहिती डॉ. अश्विन कक्कर यांनी दिली. विशेष म्हणजे  नवरात्रौत्सवाला सुरुवात झाली असून   नवरात्रौत्सवाच्या पहिल्याच दिवशी रुग्णालयात ९ मुलींचा जन्म झाला. त्यामूळे जणू काही ९ जणींच्या रूपाने नवदुर्गांनीच जन्म घेतल्याची भावना व्यक्त होत आहे. आमच्या रुग्णालयात एकाच दिवशी ११  प्रसूती होणं ही तशी नवीन गोष्ट नाही. मात्र एकाच दिवशी आणि तेही नवरात्रीच्या पहिल्याच दिवशी ९ मुलींचा जन्म होणं ही नक्कीच वेगळी आणि आनंदाची बाब असल्याचेही डॉ. अश्विन कक्कर यांनी बोलताना सांगितले. या  ९ मुलींसह इतर २  मुलांची आणि त्यांच्या आईची तब्येत ठणठणीत असून वैष्णवी रुग्णालयात एकाच दिवशी झालेल्या ९ मुलींच्या जन्माची चर्चा सर्वत्र सुरू आहे.